The Online Froissart

Online Froissart

Home | Navigate | Apparatus | Search | About The Edition | About The Project | Help

Dictionnaire du Moyen Français Settings Browse | Collate

pb 247 rau soir, ilz s’alerent logier et passerent la nuit tout aise: ilz avoient bien de quoy. A l’endemain a matin aprés boire on se arma parmi l’ost, car les trompettes a l’assault sonnerent, et puis se mistrent les seigneurs en ordonnance pour assaillir, et s’en vindrent tout le pas jusques au pié des fosséz. Qui veist donc gens d’armes entrer dedens et porter leurs targes sur leurs testes³³³ et taster le fons de leurs lances³³⁴ et aler tout oultre jusques au pié du mur, il y preist grant plaisance. Quant les premiers furent passéz et ilz eurent monstré chemin, les autres ne retarderent pas mais les suivirent de grant volenté, car blasme leur eust esté se ilz se feussent tenu derriere et leurs compaignons feussent devant, et portoient ceulz qui secondement aloient pics et hoyaux en leurs mains pour perser et hoyer le mur, et en ce faisant tenoient les targes sur leurs testes pour recevoir le giet des pierres qui venoient a la foiz d’amont, mais planté n’estoit ce mie, car les Genevoiz qui sur les fosséz se tenoient et qui ouniement traient³³⁵, occupoient si ceulx qui venoient jusques aux creneaulx pour defendre, que ilz n’osoient bouter hors leurs testes, car ces arbalestriers genevois sont si juste de leur trait que point ilz ne faillent la ou ilz visent. Si en y ot de frappéz de ceulz

de dedens plus de sept, et ferus de longs viretons parmi les testes, de quoy leurs compaignons qui aux defenses estoient redoubtoient

grandement le trait. Tant dura cil assault au chastel de Saint Sorget et si bien fu assaillis et de si grant volenté, que ceulz qui estoient au pié du mur par hoer et par miner en abatirent un grant pan. Adonc furent ceulx de dedens esbahis et se vouldrent rendre, saulve leurs vies, mais on n’en ot cure, car ilz cheïrent en si bonnes mains que messire Gautier commanda qu’ilz feussent tous occis. Depuis ceste parole, nulz ne fu prins a merci, mais furent tous mors. Onques nul n’en eschapa. Ainsi eurent de premiere venue, li baron et li chevalier de France qui la estoient venuz, le chastel de Saint Sorget. Si le rendi messire Gautier au seigneur qui la estoit, le quel l’avoit perdu en l’annee par sa folle garde, ainsi que pluseurs chasteaulx ont esté ou temps passé perdu en France.

SHF 3-51 sync

Aprés la prinse du chastel de Saint Sorget, et que messire Gautier l’ot rendu au chevalier a qui il estoit devant, le quel le fist reparer — et besoing en avoit, car les François l’avoient grandement destruit a l’assaillir et a prendre — ceulx seigneurs se departirent et s’en vindrent devant le chastel de la Bouffee, du quel Ernauton de Batefol, Gascon, estoit capitaine. Et l’avoit fortifié grandement pour la cause des François qui le devoient venir veoir, ainsi comme ilz firent. Quant on fu venu a La Boufee, on mist le siege environ, et advisierent li seigneur comment on le pourroit assaillir au plus grant avantaige sans moins traveillier leurs gens. Et quant ilz eurent tout avisié, ilz virent bien lieu, si se ordonnerent un jour et s’en vindrent celle part ou ilz tenoient la plus foible. La estoient Genevoiz arbalestriers ordonnéz pour traire, et les assaillans arrengier par derriere, lesquelz s’aquitoient loyaument de faire leur mestier, car ilz traioient si ouniement et si fort a ceulz de dedens que a paine ne s’osoit nul demonstrer. Ernauton de Batefol le capitaine estoit a

la porte ou il y avoit grant assault, et la faisoit merveilles d’armes, et tant pb 247 v

Close

Manuscript:
Navigate By:	Folios Manuscript Chapters SHF Chapters Printed Editions
Go To: