pb 59 rEt puis leur dist sa voulenté et pensee, et ce qu’il vouloit faire, lesquelx en furent tous joyeux, disans qu’ilz s’aventureroient voulentiers avecques lui, ne pour mourir ne lui fauldroient, dont il les mercia grandement.
¶ Des chevaliers estoient avecques lui messire Jaques du Sart, mesire Henry d’Usphalize, messire Oulphart de Guistelles, messire Jehan du Chastellet, le sire de Wertain, le sire de Warigny. Et des escuiers, Gilles et Thierry de Sommain, Baudouin de Beaufort, Colebiers de Bruilles, Moriaus de Lestines, Sandras d’Escarmain, Jehan de Robesart et plusieurs autres. Puis chevauchierent tout quoyement tant qu’ilz vindrent a Montais et se bouterent en la ville, et ne faisoient les François point de guet. Et descendirent devant un grant hostel ou ilz cuidoient certainement que le duc de Normandie feust, mais non estoit, ains estoit ailleurs. Si estoient leans logiéz deux grans seigneurs de Normandie, c’est assavoir de Baillouel et le sire de Briauté. Si furent assaillis vistement, et la porte de leurs hostelz brisee. Quant les deux chevalliers se virent ainsi surpris et oyrent crier: "Haynault a seneschal!", ilz furent moult esbahis. Nonpourquant, ilz se mistrent en deffence ce qu’ilz peurent, mais le sire de Baillouel fut la occis, dont ce fut dommaige, et le sire de Briauté fut pris du seneschal, et ot en couvent, sur sa foy, de venir dedens trois jours tenir prison a Vallenciennes. Dont se commencierent François estourmir et a vuidier leurs hostelz et alumer grans feux de tortilz, et resveillierent l’un l’autre et meismement le duc de Normandie, et le fist on armer en grant haste et apporter sa baniere devant son hostel. Et la se traioient gens d’armes de tous costéz.
¶ Quant les Hanuyers virent les François ainsi esmeuz, ilz ne vouldrent mie la plus demourer, ains se retraïrent bellement et saigement devers leurs chevaulx et monterent sus. Puis se partirent, quant ilz furent mis ensemble, et en admenerent jusques a X ou XII bons prisonniers, et s’en retournerent sans dommage, car point ne furent poursuis, pour tant qu’il faisoit brun et tart. Et vindrent, environ l’aube du jour, au Quesnoy, ou ilz reposerent et refreschirent. Et puis vindrent a Vallenciennes.
¶ Or parlerons du duc de Normandie, qui moult estoit courroucié du despit que les Hanuyers lui avoient fait. Si commanda au matin a deslogier et a entrer en Haynault pour tout ardoir sans nul deport.
¶ Dont chevauchierent en arroy les coureurs premiers, qui estoient bien IIC lances, dont messire Thiebault de Morueil, le Galoys de la Baume, le sire de Mirepoys, le sire de Sampy, messire Jehan de Landas, le sire de Hangest et le sire de Cramelles.
¶ Aprés chevauchoient les deux mareschaux en grant route et estoient bien VC lances.
Launch external viewer (Requires Java)
