pb 69 vguerroioit le royaume de France, et seoit devant Tournay, que le roy Phelippe envoia gens en Escoce, qui arriverent en la ville de Saint Jehan. Et prioit adonc le roy de France a ces dessus nomméz d’Escoce qu’ilz voulsissent esmouvoir et faire si grant guerre sur le royaume d’Angleterre, qu’il couvenist que le roy anglois s’en ralast oultre et deffeist son siege de devant Tournay et leur promist a aidier de puissance de gens et d’avoir. Siques en ce temps que ce siege fut devant Tournay, ces seigneurs d’Escoce se pourveirent, a la requeste du roy de France, pour faire une grande chevauchee sur les Anglois.
¶ Quant ilz furent bien pourveuz ainsi qu’il leur besoingnoit, ilz se partirent de la forest de Gedours et alerent par toute Escoce reconquerre les forteresces celles qu’ilz porent ravoir, et passerent oultre la bonne ville de Bervich et la riviere de Thun, et entrerent ens ou païs de Northombrellande, qui jadiz fut royaulme.
¶ La trouverent bestes grasses a grant foison. Si gastoient tout le païs si gastoient tout le païs qu’ilz destruisierent et ardirent tout jusques a la cité de Dureine et asséz oultre. Puis s’en retournerent par un aultre chemin, gastant et ardant tout le païs, si qu’ilz destruirent bien en celle chevauchee trois journees loing du païs au roy anglois. Et puis rentrerent ou païs d’Escoce et reconquistrent toutes les forteresces que le roy anglois tenoit, hors mis la bonne cité de Bervich et trois fors
chasteaulx qui leur faisoient trop grant ennuy et souvent, pour les vaillans gens qui les gardoient et le païs d’entour aussi.
¶ Et estoient et sont encores en trois chasteaulx si fors que a peines pourroit on trouver si fors en nul païs. Si appelle on l’un Strumelin, l’autre Rosebourch et le chastel de Handebourch siet sus une haulte roche, par quoy on voit tout le païs d’environ, et est la montaingne si droitte que a grant peine y pouoit un homme monter sans reposer deux foiz ou trois, et aussi un cheval a demie chargé. Et estoit cil adoncques qui plus faisoit de contraire a ces seigneurs d’Escoce et a leurs gens, et en estoit chastellain et gardien pour le temps un vaillant chevallier anglois qui s’appelloit messire Gaultier de Limosin, frere germain a messire Richart de Limosin, qui si vaillantment se tint et deffendi a Thun l’Evesque contre les François.
Or advint, en ce temps que le siege se tenoit devant Tournay, et que ces seigneurs d’Escoce, si comme dessus est dit chevauchoient parmi les païs d’Escoce reconquerans les forteresces a leur loyal pouoir, messire Guillaume de Douglas s’avisa d’un grant fait et perilleux et d’une grant soubtillité, et le descouvry a aucuns des compaingnons, au conte Patris, a messire Simon Fresiel, qui avoit esté gardien du roy David d’Escoce, et a Alixandre de Ramesay, qui tous pb 70 r
Launch external viewer (Requires Java)
