Encores estoit le chastel d’Aulroy en la saisine du duc de Bretaigne qui tout quoy estoit en Angleterre, si renvoya plusieurs seigneurs de France et de Bretaigne et y fut siege mis grant et plainier et dura long temps. Ceulx d’Aulroy qui ne virent nul aparance d’estre secourus de nul costé entrerent en traitié par condicion s’ilz n’estoient confortéz de duc de Bretaigne et du roy d’Angleterre fort asséz pour tenir la place dedens certain jour denommé ilz se devoient rendre. Ce traictié fut accordé le jour vint les Françoys tindrent leur journee nul ne s’aparut du duc de Bretaigne ne des Anglois, si fut le chastel rendu et mis en obeissance du roy de France. Ainsi comme les autres chasteaux et bonnes villes du païs de Bretaigne estoient et se departirent d’Aulroy ceulx qui y estoient depar le duc de Bretaigne.
SHF 1A-793 syncL’an de l’incarnacion Nostre Seigneur mil CCC LXXVIII en la nouvelle saison tantost aprés Pasquez, le roy Charles de France qui vit comment ceulx de Chierbourc guerrioient durement le païs et gastoient le clos de Constentin ordonna monsire Guillaume des Bordes, vaillant chevalier et bon capitaine a estre gardien et souverain capitaine de Constentin et de toutes les forteresces a l’encontre de Chierebourc. Si s’en vint le dit monsire Guillaume atout belle route de gens d’armes et d’arbalestriers gennevois et vint gesir a Montbourc dont il fist bastide contre Chierbourc et fist plusieurs chevauchees et tresvolentiers eust trouvé a jeu party la garnison de Chierbourc car il ne desiroit tant riens qu’il les peust combatre car il se sentoit bon chevalier vaillant, renommé, hardi et entreprenant et consideroit qu’il avoit fleur de gens d’armes avecques lui de ses garnisons. En ce temps mesmes fut envoyé capitaine de Chierebourc un chevalier anglois apellé monsire Jehan Harleston de qui j’ay plusieurs foiz parlé ça arriere. Si avoit esté grant temps capitaine de Guines, le quel monta en mer a Hantonne a CCC hommes d’armes et CCC archiers.
Tant naga qu’il arriva a Chierebourc et estoit de sa route un vaillant chevalier de Savoye appellé monsire Othés de Grantson et des Anglois y estoient monsire Jehan Arbourc, monsire Jehan Ourselee et plusieurs chevaliers et escuiers marchés. Si tost qu’ilz furent arrivéz ilz mistrent hors leurs chevaulx et harnoiz et se rafreschirent aucuns jours et mistrent leurs besoingnes a point et commancerent a chevauchier sur le païs et faire grant guerre. Aussy monsire Guillaume des Bordes soutilloit nuit et jour comment et en quelle maniere il leur peust porter dommage. Si sachiéz que en la saison les deux capitaines mistrent maintes embusches l’un sur l’autre a pou de fait, car l’aventure ne donnoit mie qu’ilz trovassent l’un l’autre fors aucuns compaignons qui s’aventuroient folement tant pour honneur acquerre comme pour gaignier et trouver aventures ceulx s’entrencontrerent souvent et ruerent l’un l’autre jus. L’un jour gaingnoient les François et l’autre foiz perdoyent, ainsi que fais d’armes se demainent.
SHF 1A-794 sync Comment la garnison de Chierebourc desconfist la garnison de Montbourc et comment monsire Guillaume des Bordes fut pris a rençon et la pourveance que le roy de France y fist. pb 249 vLaunch external viewer (Requires Java)
