Tout le jours multiplioit l’ost au duc d’Anjou et lui venoient gens de tous costés, car chevaliers et escuiers qui se desiroient a advancier le venoient veoir et servir. Si fut mis le siege devant Saint Makaire, bel et fort et bien ordonné. Et vous di que la dedens estoient retraiz toutes manieres de gens d’armes qui estoient partis des garnisons qui rendues s’estoient, si en estoit la ville plus forte et mieulx gardee. Si y ot la plusieurs grans assaulx et beaulx et fait mainte belle escarmouche devant la ville aux barrieres. Adonc fut ordonné du duc d’Anjou et du connestable de France le siege estant devant Saint Makaire que les capitaines et leurs routes chevaulchassent le païs li ungs ça et l’autre la. Si se departirent gens d’armes de tous léz, premierement le mareschal de France atout grant route, Yvain de Galles a grant route, messire Percevaulz d’Anieval a grant route et Guillaume de Montcomptour avec lui. Si demourerent ces gens d’armes six jours sur les champs et prindrent plusieurs villes et petis fors et mirent tout le païs de la environ en leur subjeccion et en l’obeissance du roy de France, ne nulz ne leur aloit au devant. Car le païs estoit tout wit et despourveu de gens d’armes de la partie des Anglois et s’en aloient les fuians devers Bourdeaulx. Quant ilz orent fait leur chevaulchee ilz retournerent en l’ost. Ceulx de Saint Makaire congnurent bien que ilz ne se pouoient longuement tenir que ilz ne feussent pris. Et on leur promettoit tous les jours se par force ilz estoient pris ilz seroient tous mors sans mercy. Si doubterent de la fin que elle ne leur feust trop cruelle et firent en secret traittier devers les François que voulentiers ilz se rendroient sauves leurs vies et le leur. Les gens d’armes qui dedens Saint Makaire estoient perceurent bien ce convenant si se doubterent des hommes de la ville qu’ilz ne feissent aulcun mauvais traittié contre eulx. Si se trahirent tantost devers le chastel qui est bel et fort et qui fait bien a tenir, et y bouterent tout le leur et encores du pillage asséz de la ville. Adonc se rendirent ceulx de la ville de Saint Makaire et se mistrent tous en l’obeissance du roy de France.
SHF 2-15 sync¶ Nouvelles estoient venues au duc d’Anjou tres le siege estant devant Montsegur que la duchesse sa femme estant a Thoulouse estoit acouchee d’un filz. Si devéz sçavoir que le duc et tout l’ost en estoient tous liéz et les faiz d’armes empris plus hardiement. Sitost que Saint Makaire se fut rendu on entra dedens la ville, car la avoit beaulx logeiz et grans si s’adviserent que la se rafreschiroient toutes gens d’armes et bien trouverent de quoy, car la ville estoit bien pourveue. Si fut le chastel environné et mist on engins devant qui onniement gettoient pierres de fais et ce esbahist grandement ceulx de la garnison. Entrementes que on estoit la a siege vindrent les vraies nouvelles du pb 373bis v
Launch external viewer (Requires Java)
