pb 68 r Et vous dy encores, pour tout ramentevoir, a entrer dedens des premiers il y avoit ung moynne que on appelloit damp Froissart. Cilz y fist merveilles d’armes, et en occist et mehaingna, au devant d’un pertuis ou il se tenoit, plus de XVIII, et n’osoit nul entrer par le lieu qu’il gardoit. Mais finablement il le couvint partir, car il vit que les Hannuyers entroient dedens l’abbaie, et avoient pertuisié le mur en pluseurs lieux. Si se sauva le dit moynne au mieulx qu’il pot, et fist tant qu’il vint a Mortaigne.
SHF 1-130 syncQuant le conte de Haynault et messire Jehan de Haynault son oncle et la chevallerie de Haynaut furent entréz en l’abbaie, ainsi que vous avéz ouy, si commanda le dit conte que on meist tout a l’espee sans nulluy prendre a mercy, tant estoit il courrouciéz sur ceulx de Saint Amand pour les despis qu’ilz avoient faiz a ceulx de son païs. Si fut la dite ville moult tost emplie de gens d’armes, et de bidaux et de Gennevois qui la estoient enchaciéz et qui de rue en rue, d’ostel en hostel, pou en eschapperent qui ne feussent tous mors et occis, car nul n’estoit pris a mercy. Et mesme le seneschal de Carcassonne y fut occis dessoubz sa banniere, et plus de deux cens hommes environ lui.
¶ Ainsi fut Saint Amand destruitte, dont ce fut grant dommage. Et puis retourna le conte ce propre soir devant Tournay. Et l’endemain les gens d’armes de Valenciennes et la communaulté vindrent a Saint Amand, et parardirent la ville et toute l’abbaye et le grant monstier. Et briefment toutes les cloches briserent et rompirent, dont ce fut grant dommage, car il en y avoit moult de bonnes et melodieuses, et si ne leur vindrent a nul proffit qui a compter face.
Aprés la destruction de Saint Amand, le conte de Haynault, qui trop durement avoit pris ceste besoingne au cuer et qui en
estoit plus aigre que nul des autres, se party du siege de Tournay et
sa route, et y avoit environs cinq cens armeures de fer, et s’en vint ardoir Orchies et Landes et Lacelle et grant
foison de villages de la environ. Et puis passa lui et toute sa route la riviere de
l’Escault au dessus de Hanon, et entrerent la en France tant qu’ilz vindrent a Marchiennes, une grosse et riche abbaye dont
messire Aymé de Venans estoit cappitaine, et avoit avecques lui une partie
des arbalestriers de Douay. La ot grant assault, car le chevallier avoit durement bien garnie la premiere porte de l’abbaie,
qui estoit avironnee de fosséz plains de a eaue. Et se deffendirent les François et les moynnes qui dedens estoient vassaulment, mais finablement ilz ne porent durer contre tant de gens d’armes, car ilz quistrent et firent
tant qu’ilz orent des bateaulx qu’ilz mistrent en l’eau, et par telle maniere entrerent ilz
dedens l’abbaie. Mais la fut noiéz ung chevalier allemant compaignon
au seigneur de Fauquemont, qui s’appelloit messire Bacho de la Wiere, dont le
sire de Fauquemont fut durement courrouciéz.
¶ A l’assault de la porte ou messire Ayme Warmant se tenoit, furent moult bons chevalliers le pb 68 v
Launch external viewer (Requires Java)
