pb 42 r leurs peines.

¶ Au dehors de Yanville a un beau moulin a vent, si fut abatus et tous dessiréz. Asséz pres de la a deux gros villages que on dit a Puisset, et la vindrent ceulz de l’avantgarde disner, et le conte de Bouquighem se disna a Yterville et descendy a la maison des Templiers. Ceulx qui estoient au Puisset entendirent que il avoit une grosse tour qui la siet en la quelle avoit environ LX compaignons, si ne se peurent abstenir ceulx de l’avantgarde que ilz ne les alassent veoir et assaillir et l’environnerent tout autour. Car elle siet en plaine terre a petit de deffense. La ot grant assault, mais il ne dura pas longuement. Car ces archiers trayoient si onniement que a peines s’osoit nulz mettre ne apparoir aux garites ne aux deffenses. Si fut la tour prise, et ceulx de dedens mors et pris qui la gardoient, et puis bouterent les Angloys le feu dedens, de quoy le charpantaige chey tous et puis passerent oultre, et se hastoient les Angloys de passer delivreement celle Beausse pour la doubte des eaues dont ilz estoient a grant meschief pour eulx et leurs chevaux, car ilz ne trouvoient que puys mout parfons et a ces puys n’avoient nulz seaulx. Si avoient a trop grant meschief et dongier de l’eaue, et orent tant que ilz vindrent a Ourmoy, et la se logierent sus la riviere de la Venie et la se reposerent et refreschirent deux nuiz et un jour. A l’endemain ilz se deslogierent et s’en vindrent a Villeneufve la Ferté en la conté de Bloys a la veue du Chastel Dun, et s’en vindrent logier en la forest de Marceaunoy en Bloys, et la s’arresta tout l’ost pour le plaisant lieu et bel que ilz y trouverent et si y reposerent et refreschirent par trois jours.

Dedens la forest de Marceausnoy ¹²⁶ a une tresbelle et bonne abbaye de moinnes de l’ordre de Citeaulx¹²⁷, et proprement on appelle celle abbaye Citeaulx, et est l’abbaye reamplie de moult grans, beaulx et nobles ediffices, et la fist jadis fonder et ediffier un moult vaillant et preudons qui s’appelloit le conte de Bloys, et y laissa et ordonna grans revenues et belles, mais les guerres les ont moult diminuees et amendries et affoiblies. Depuis les moinnes qui pour le temps estoient en l’abbaye furent seurpris des Angloys, car ilz ne cuidoient mie que ilz voulsissent faire ce chemin. Si leur tourna a contraire quoyque le conte de Bouquighem feist faire un bang sur la teste que nulz ne feist a l’abbaye villenie de feu ne d’autre chose. Car le jour Nostre Dame en septembre, il y ouy messe et fut tout le jour la, et y tint son estat et court ouverte aux chevaliers de son ost. Et la fut ordonné que Gauvains Michaille, François, et Janekins Cator parferoyent a l’endemain leur emprinse. Ce jour vindrent les Angloys veoir le chastel de Marceausnoy qui est en la conté de Bloys, et y a un tresbel fort et de belle veue. Pour le temps en estoit cappitaine et gardien un chevalier du paÿs au conte de Bloys qui s’appelloit messire Guillaume de Saint Martin, saige homme et vaillant aux pb 42 v