pb 184 r deffense n’avoit. Sy entrerent ens les Françoys par eschielles, et passerent les fosséz a grant peine. Quant ilz furent dedens, ilz cuidierent avoir merveilles gaingné, mais ilz ne trouverent riens fors que povres gens, femmes, enffans, et grant foyson de bons vins, dont par despit et par envie Bretons et Bourgoingnons bouterent le feu en la ville, et fut presques toute arse, de quoy le roy de France et le duc de Bourgoingne furent grandement courrouciéz, mais amander ne le pouoient, ce leur couvint passer. Sy furent les gentilzdames sauvees et gardees, sans nul mal avoir.

Aprés la reprinse du Dam, que le roy de France et les Françoys reprinstrent, si comme cy dessus est contenu, on ot conseil que on se deslogeroit, et yroit le roy logier ad Artevelle, a deux petites lieues pres de Gand, et entrementres que le roy se tendroit la, les gens d’armes efforcieement chevaucheroient oultre ens ou paÿs des Quatre Mestiers, et destruiroyent tout ycelluy paÿs, pour la cause de ce que toutes doulceurs en estoient du temps passé venues a Gand, et avoyent ceulx de ce paÿs, que on dist les Quatre Mestiers, plus conforté les Gantoys que nulz autres gens. Adont se departist on du Dam, et prist on le chemin de Artevelle, et la vint le roy logier. Entrementes entrerent ses gens en ce paÿs des Quatre Mestiers, et l’ardyrent et destruisirent tout entirement, et abatirent tours et fors moustiers qui tousjours s’estoient tenuz, et n’y laissierent oncques d’entiere maison ne hamel, homme ne femme ne enffans, tout fut chacié en voys ou tout occis. Quant les Françoys orent faitte celle envaye, il fut ordonné que on yroit mettre le siege devant le chastel de Gauvre, et puis retourneroit on devant Gand, mais il n’en fut riens fait, je vous diray pourquoy. Le roi de France estant a Artevelle, qui y fut environ XII jours, nouvelles luy vindrent de Hongrie depar la royne. Car la vint l’evesque de Basseres en ambaxaderie, et plusieurs chevaliers et escuiers en sa compaignie de Hongrie, et apportoyent lettres de creance, et venoient querre leur seigneur, le frere du roy, Loÿs de France, a ce jour conte de Balloys , pour le emmener en Hongrie a sa femme, laquelle par procuracion messire Jehan la Personne, un chevalier de France, avoit espousee. Ces nouvelles pleurent trop grandement au roy de France et au duc de Bourgoingne, et fut regardé adonc que pour entendre a l’estat et arroy du jeune conte de Valloys, on retourneroit en France, et que on en avoit asséz fait pour celle saison.

Lors se departy le roy de Artevelle, le XIIe jour de septembre, et orent congié toutes manieres de gens d’armes, et s’en rala chascun en son lieu. Et ja estoit retrait, tantost aprés la prinse du Dam, Guillaume de Haynault arrieres en son paÿs et avoit prins congié au roy. De ce departement furent les Gantoys tous resjouyz. Car ilz cuidoient bien avoir le siege.

¶ Or s’en retourna le roy de France et vint a Creil, ou la royne sa femme pb 184 v