pb 185 v chevauchee en Lymosin et en Poitou, et y reprint plusieurs fors et garnisons anglesches qui se tenoyent, telz que l’Estin , Trencete, Arciach, Garnace, Monltleu, a VIII lieues de Bourdeaulx, et Caillebourc , le Bourc sus Tarente, et puis s’en vint mettre le siege devant Bretueil, un moult bel et fort chastel en Poitou, sus les marches de Lymosin et de Saintonge. De Bretueil estoient cappitaines Andrieu Privars, Anglois, et Bertran de Mon Trivet, Gascon, et avoyent avecques eulx la dedens grant foyson de bons compaignons, si y ot plusieurs assaulx et escarmousches et plusieurs grans appertisses d’armes faittes, et presques tous les jours y avoit aux barrieres de ceulx de dehors a ceulx de dedens d’escarmousches et fait d’armes, des mors et des bleciéz. Et bien disoit le duc de Bourbon que point de la ne partiroit, s’auroit le chastel a sa voulenté, et ainsi l’avoit il prommis au duc de Berry la derraine foiz que il avoit parlé a luy. Et advint, le siege estant devant Bretueil, que Bertrain de Mont Trivet, qui estoit l’un des cappitaines, devisoit a faire un fossé par dedens le fort pour eulx mieulx fortiffier, et ainsi comme il le monstroit et devisoit l’ouvraige a ses gens, et veéz cy venir le trait d’une dondaine que ceulx de l’ost laissierent aler, duquel trait et par mesaventure Bertran fut acconsuiviz et la occis, lequel estoit en son temps eschappéz de XVI sieges tous perilleux. De la mort de Bertran furent les compaignons effrayéz et courrouciéz, mais admender ne le porent. Sy demoura Andrieu Privars cappitaine. Depuis, environ XV jours, fut un traittiéz faiz de ceulx du fort a ceulx de l’ost, et se rendirent, le chastel et les pourveances, et furent saufconduit jusques a Bouteville sauves leurs vies, dont Durandon de la Perrade estoit cappitaine. Ainsi orent les Françoys le chastel de Bretueil, si le remparerent et le rafreschirent de nouvelles pourveances et d’artellerie et de gens d’armes, et puis s’en partirent et s’en vindrent rafreschir a Taros, une bonne ville et grosse abbaye, et la environ sus le paÿs. Et puis s’en vindrent a Limoges, et la se tint le duc de Bourbon VIII jours, et ot conseil de retourner en France, ainsi qu’il fist, et trouva le roy a Paris et son nepveu de Valloys, et tous ses mariaiges brisiéz.

¶ Or revendrons nous aux besoingnes d’Escoce et a l’admiral de France, qui toutes advindrent en celle sayson.

Vous avéz bien cy dessus ouy recorder comment l’admiral de la mer, atout grant carge de gens d’armes, arriva ou havre de Haindebourch en Escoce, et comment ses gens trouverent un autre paÿs que ilz ne cuidoyent. Les barons d’Escoce et le conseil du roy l’annee passee avoient infourmé les chevalliers quy y avoyent esté, messire Gieffroy de Chargny et messire Aymart de Marsé, que, se le admiral de France, ou le connestable, ou les mareschaulx de France passoient la mer en Escoce, atout mille lances de bonnes gens et VC arbalestriers, et eussent avecques eulx le harnoys d’armes pour armer eulx mille en Escoce, avecques l’ayde et le demourant du royaulme d’Escoce ilz combatroyent bien les Angloys, et feroyent un si grant treu en Angleterre que jamaiz ne seroit recouvré. Sus cest estat avoient l’admirault et les Françoys passee la mer et estoyent venuz en Escoce, sy ne pb 186 r