pb 388 v amé femmes, et encores en ses jours il avoit une tresbelle dame a amie ou a la foiz il se deportoit, car de grant temps avoit, il estoit vesves. Une nuit il avoit geu avecques elle, si retourna en sa chambre tous frileux et dist a un de ses varléz de chambre: "Appareilléz moi ce lit, car je me vueil un petit couschier et resposer." Il fut fait, il se despouilla et se mist en ce lit. Quant il fut couschiéz, il commença a trembler et ne se pouoit reschauffer, car ja avoit il grant aage, environ soixante ans, et avoit on d’usaige que pour lui reschauffer et faire suer, on boutoit une buysine en son lit, laquelle estoit d’arain, et lui souffloit on air voulant. On dit que c’est eaeaue ardant, et cela le reschauffoit et faisoit on suer, si comme on avoit fait autre foiz sans meshaigner. On fist adonc la chose, on tourna sus le pis pour le roy, ainsi que Dieu ou les deables le vouldrent. Flame ardant se bouta en ce lit entre ces linsceulx, par telle maniere que le roy, qui estoit la couschiéz et enveloppéz entre autrs linsceulx fut attains de celle flame, par telle maniere que on n’y pot oncques venir a temps ne lui secourir qu il ne feust tous ars jusques a la boudine. Et pour ce ne mourut il pas sitrestost, mais vesqui bien XV jours en grant peine et en grant misere, ne cysurgiens ne medecins n’y sceurent oncques remedier que il ne mourust. Ce fut la fin du roy de Navarre.

¶ Ainsi furent ses bonnes gens delivres et la taille quitte de non cueillir ne payer, et son filz le roy Charles qui fut beau chevalier, jeunes, grans et fors, et estoit au jour que je escripsi et translatay ceste hystoire, fut roy de Navarre et des tenances, et se fist couronner tantost aprés l’obseque fait de son pere en la cité de Pam pelune.

Vous avéz bien cy dessus ouy recorder comment les traittiéz se faysoyent du conte d’Armignach et du daulphin d’Auvergne, de Cevaldam et de Limosin, lesquelz estoyent annemys a tous leurs voysins. Plusieurs s’y enclinoyent et se vouloient bien partir, car il leur sembloit que ilz avoient asséz guerroyé et travaillié le royaulme de France, si vouloyent aler d’autrepart piller, car le conte d’Armignach leur prommetoit de mener en Lombardie et le conte de Foix, qui n’est mye legier a decepvoir, penssoit tout le contraire. Tous quoys se taysoit pour veoir la fin de ceste besoingne, et enqueroit soingneusement a ceulx qui tailléz estoient d’en sçavoir comment ces traittiéz se portoyent et quel part ces gens d’armes se trairoyent quant partis de leurs fors seroient. Ilz lui disoient la commune renommee qui couroit. Il baissoit la teste ou il la hoschoit et disoit: "Nennil, tous les jours viennent nouvelles soultivetéz entre gens d’armes. Le conte d’Armignach et Bernard son frere sont jeunes, et bien sçay que ilz ne me ont pas trop en grace, ne mon paÿs aussi; sy pourroyent ces gens d’armes retourner sur moy. Et pour ce me vueil je pourveoir a l’encontre de eulx et tant faire que je n’y aye ne blasme ne dommaige, car c’est possession de longtaine promission." Ainsi disoit le conte de Foix, et veritablement il n’avoit pas folle ymaginacion, si comme les apparances en furent une foiz et que vous orrés recorder, se je puis traittier ne venir jusques a la. SHF 3-240 sync Encores avéz vous moult bien ouy compter de Gieuffroy Teste Noire, Breton, qui tenoit et avoir tenu longtemps la garnison pb 389 r