pb 249 v que tele chose avoit ceans, mais point n’y pensoie ne ne m’en donnoie de garde que ceulx qui s’en sont aléz deussent partir par la cave." "En nom Dieu," dist messire Gautier, "si ont fait, ainsi comme il appert. Et sont donc li chastel de ce païs de tele ordonnance?" " Sire," dist messire Hugues, "de telz chasteaulx a pluseurs en ce païs, et par especial tous les chasteaulx qui jadiz furent a Regnault de Montauben sont de tele condicion, car quant ilz et ses freres guerroierent au roy Charlemaine de France, ilz les firent ordonner de tele façon par le conseil de Maugis leur cousin; car quant le roy les assegoit par puissance et ilz veoient que ilz ne pouoient eschaper, ilz se boutoient en ces minieres et s’en aloient sans prendre congié." "Par ma foy," dist messire Gautier, "j’en recommande bien l’ordonnance. Je ne sçay se je seray jamais guerroié de roy ne de duc, ne de voisin que j’aie, mais moy retourné en mon paÿs, je en feray faire une des mines par dedens terre en mon chastel de Pasach."
SHF 3-53 sync¶ Adonc fina a tant leur parlement, et pristrent la sai
sine du chastel, et puis ordonnerent de mettre et laissier dedens gens d’armes et garnison pour le garder, et passerent oultre en entencion de venir devant la ville et chastel de Cruvale, dont Espaignolet de Paperan, Bascles, estoit capitaine, avec lui grant foison de pillars et de robeurs.
Tant exploitierent li seigneur et leur route que ilz vindrent devant la garnison de Cruvale en Rabescen, et la s’arresterent et mistrent siege tout a l’environ. La voult savoir messire Gautier au seneschal de Thoulouse, et lui demanda, se Cruvale avoit esté anciennement des chasteaux Regnault de Montauben. Il respondi: "Ouil." "Et dont y a il dedens une mine soubz terre comme aux autres?" "En nom Dieu," dist messire Hugues, "c’est verité, voirement y a il soubzterrine, et par celle la prinst la seconde foiz Espaignolet, et le seigneur dedens." "Faites venir", dist messire Guichart Daulphin qui la estoit a ces paroles, "le chevalier qui la estoit." "C’est bon," ce dist messire Gautier de Pasach, "si nous enfourmerons de la verité par lui." Adonc fu appelléz messire Raymmon de Cruvale 343, et lui fu demandé de la maniere et l’ordonnance du chastel, et s’il y avoit une voie dedens terre, si comme il y a a La Boufee. Il respondi:
"Vraiement, ouil, car par la voie ou conduit fu je prins, et l’avoie condempné grant temps a, a estre perdue, mais li larron qui tiennent
mon chastel la refirent et vuiderent, et me prindrent par celle voie."
"Et savéz vous ou elle abouche ne ou elle vuide?" dist messire Gautier. "Ouil, monseigneur," dist il, "elle vuide en un bois qui n’est pas trop loing de ci."
"C’est bien", dist messire Gautier, et se tust a tant. Quant ce vint au chief de
quatre jours il se fist la mener, et avoit en sa compaignie bien CC groz varlés du païs bien arméz, et s’en vint, et messire Raymon de Cruvale en sa compaignie, jusques au bois ou la mine se vuidoit. Quant messire Gautier vit l’entree, il la fist descouvrir et oster la terre et les herbes et les ronces qui estoient a l’environ. Quant elle fu bien nettoiee il fist alumer grant foison de faloz, et dist a ceulx qui ordonnéz estoient pour entrer la pb 250 rLaunch external viewer (Requires Java)
