pb 117 rfeste feust sceue et cogneue en toutes marches, le roy d’Angleterre l’envoya publier et denoncier par ses heraulx en France, en Escoce, en Bourgoigne, en Haynaut, en Flandres et en Brebant et aussi en l’empire d’Alemaigne. Et donnoit a tous chevaliers et escuiers qui venir y vouloient, XL jours de saufconduit aprés la feste, et devoit estre a ceste feste une jouste de XL chevaliers de pardedens, attendans tous autres, et de XL escuiers aussi. Et devoit seoir ceste feste le jour de la saint George prochain venant, que on compteroit l’an de Grace M CCC XLIIII, ens au chastel de Windesore. Et devoit estre la royne d’Angleterre acompaignee de CCC dames et damoiselles, toutes nobles et gentilz dames, et parees d’uns parement semblables.

Endemantiers que le roy d’Angleterre faisoit un grant appareil pour recevoir seigneurs,dames et damoiselles qui a la feste vendroient, lui vindrent les certaines nouvelles de la mort du seigneur de Cliçon et des autres chevaliers nomméz et encoulpéz de faulseté et de traÿson. De ces nouvelles fut le roy d’Angleterre durement courroucié, et lui sembla que le roy de France l’eust fait en son despit. Et tint que, parmy ce fait, les treves accordees en Bretaigne estoient enfraintes et prisees. Si ot en pensee de faire le semblable fait du corps monseigneur Hervy de Leon, qu’il tenoit pour son prisonnier, et l’eust fait en son ireur et tantost ce n’eust esté son cousin le conte d’Erby, qui le reprint durement et lui demonstra devant son conseil de belles raisons tant pour son honneur garder et son couraige affrener, et lui disoit: "Monseigneur, se le roy Phelippe avoit faite sa hastiveté et sa felonnie de mettre a mort ces vaillans chevaliers que ceulz estoient, n’en vueilliéz pour ce blecier vostre couraige. Car, au veoir considerer, vostre prisonnier n’a que faire de comparer cel oultraige, maiz le vueilléz mettre a rançon roisonnable." Le roy d’Angleterre senty et cognut que son cousin lui disoit toute verité, si se rappaisa et reffrena son maltalent, et fist le chevalier venir devant lui, quant le roy le vit devant lui si dist: "Ha, messire Hervy, mon adversaire Phelippe de Valoys a monstré sa felonnie trop crueusement quant il a fait mourir villainement telz chevaliers que le seigneur de Cliçon, le seigneur de Vaugour, le seigneur de Malatret, messire Thibaut de Montmorillon, le seigneur de Rochetison et plusieurs autres, dont il me desplaist grandement, et semble a aucuns de nostre partie qu’il l’ait fait en mon despit, et se je vouloye regarder a sa felonnie, je feroye de vous le semblable fait, car vous m’avéz fait plus de contraires en Bretaigne et a mes gens que nul autre, mais je me souffreray, et lui lairay faire sa voulenté, et garderay mon honneur a mon pouoir, et vous lairray venir a rançon legiere et gracieuse selon vostre estat, pour l’amour de mon cousin le conte d’Erby qui cy est, qui en parle et en prie, mais que vous vueilliéz faire ce que je vous diray." Le chevalier ot joye, quant il entendi qu’il n’auroit garde de mort. Si respondi en lui moult humiliant: "Chiers sires, je feray a mon pouoir loyaument tout ce que vous me commanderéz." Lors dist le roy: "Messire Hervy, je sçay bien que vous estes ung des plus riches chevaliers de Bretaigne et que, se je vous vouloye bien presser, vous paieriés XXXM ou XLM escuz. Je vous diray que vous feréz, vous iréz devers mon adversaire Phelippe de Valoys et lui diréz depar moy que, pour tant qu’il a mis a mort villaine si vaillans chevaliers pb 117 v