pb 328 vpertises, la et ailleurs. Quant il fut devant les barrieres de Noyon, il mist pié a terre jus de son coursier et dist a son page: "Ne te pars point d’ici." Et prist son glaive en son poing et s’en vint jusques aux barrieres, et s’escueilli et sailli oultre pardedens les barrieres. La avoit de bons chevaliers du païs, messire Jehan de Roye, messire Lancelot de Lorris et bien dix ou douze qui furent dix ou douze qui furent tous esmerveilliéz qu’il vouloit faire. Neantmoins ilz le recueillirent moult faiticement. La dist le chevalier escot: "Seigneurs, je vous viens veoir. Vous ne daignéz issir hors de vos barrieres, et je y daigne bien entrer. Je vueil esprouver ma chevalerie a la vostre, et me concqueréz se vous pouéz." Aprés ces mots il geta et lança grans cops de son glaive a eulx, et eulx a lui des leurs. Et fut en cel estat, contre eulx lui tout seul, sur eulx escarmouchant et faisant tres grans appertises d’armes, plus d’une heure, et navra ung ou deux des leurs. Et prenoit si grant plaisance a lui combatre que il se entreoublioit, et les regardoient les gens de la ville et de la porte et des garittes a grant merveilles. Et lui eussent porté grant dommage du trait se ilz eussent voulu, mais nennil, car les chevaliers françois leur avoient deffendu. Tant fut en cel estat que son page vint sur son coursier moult pres des barrieres, et lui dist tout en hault en son langaige: "Monseigneur, partéz vous: il est heure, car nos gens se partent." Le chevalier qui bien l’entendi s’appareilla sur ce et lança depuiz deux ou trois cops. Et quant il ot fait, il prist son glaive et se relança a l’autre léz sans nul dommage et, tout armé qu’il estoit, il se geta sur son coursier derriere son page. Quant il fut sus, il dist aux François: "Grans mercis seigneurs, et adieu." Si brocha des esperons et fut tantost a ses compaignons. Laquelle appertise de messire Jehan Assueton fut durement prisee de toutes gens.

Messire Robert Canolle a son departement qu’il fist de la marche de Noyon et ses gens, ilz ardirent la ville du Pont l’Evesque sur la riviere d’Oyse, ou il avoit de grans hostelz. Les chevaliers et escuiers qui estoient en la cité de Noyon orent grant desplaisance de ce feu, et entendirent que messire Robert Canole estoit partiz et retraiz ensemble sa route. Si vindrent de la cité de Noyon environ LX lances, et vindrent encores si appoint en la ville du Pont l’Evesque que ilz trouverent ceulx qui le feu y avoient bouté et des aultres aussi qui entendoient au pillage. Si furent resveilliéz de grant maniere, car la plus grant partie furent mors et occis, et demourerent sur la place, et y gaignerent les François plus de quarante chevaulx et rescouirent plusieurs prisonniers qu’ilz en vouloient mener. Et encores sauverent de beaulx hostelz qui eussent tous esté pb 329 r