pb 124 rvouloit prendre a mercy, mais il me semble que nennil." De ces nouvelles ne furent mie le conte d’Erby et monseigneur Gaultier de Mauni bien joyeulx, et distrent entre eulx: "Ce seroit lascheté et villanie si nous laissions perdre III si bons chevaliers que ceulz sont, qui si franchement se sont tenuz dedens Auberouce. Nous irons celle part et nous esmouvrons tout premierement et manderons au conte de Pennebruch qui se tient a Bregerath qu’il soit deléz nous a celle heure et aussi a monseigneur de Stanfort et a monseigneur Estienne Detourby, qui se tient a Liebrone." Adonc le conte d’Erby se hasta durement et envoya ses messages et ses lettres devers le conte de Pennebruth et se parti de Bourdeaux a ce qu’il avoit de gens et chevaucherent tout couvertement dever Auberouce, bien avoit qui le menoit et qui cognoissoit le païs. Si vint le dit conte d’Erby et vint a Liebrone et la sejourna un jour en attendant le conte de Pennebruth, et point ne vint. Quant il vit qu’il ne venoit point, si fut tout courroucié et se mist a voye pour le grant desir qu’il avoit de conforter ses chevaliers qui en en Auberouce se tenoient, car bien savoit qu’ils en avoient grant mestier.

¶ Si yssirent de Liebrone le conte d’Erby, le conte de Kenfort, monseigneur Gautier de Mauni, monseigneur Richart De Stanfort, monseigneur Hue de Hastinges, monseigneur Estienne de Tourby, le sire de Ferrieres et les autres compaignons, et chevaucherent toute une nuit et vindrent a l’endemain a II petites lieues d’Auberouce, si se bouterent en un boys et descendirent de leurs chevaulx, et les lierent aus abres et les laisserent pasturer en l’erbe, tousjours atttendans le conte de Pennebruth, et furent la toute la matinee jusques a nonne. Quant ce vint sur l’eure de remotee et ilz virent que point ne venoit le conte, si distrent entre euls: "Que ferons nous? Irons nous assaillir noz ennemis, ou nous retournerons?" La furent en grant ymaginacion quelle chose ilz feroient. Car ils ne se veoient mie gens pour combatre un tel ost qu’il y avoit devant Auberouce, car ilz n’estoient pas plus de CCC lances et VIC archiers, et les François pouoient bien estre entre XM ou XIIM hommes, et envis aussi les laissoient, car bien savoient, se ilz se partoient sans lever le siege, ilz le perdroient le chastel d’Auberouce et les chevaliers leurs compaignons qui dedens esto. Finablement, tout consideré et pesé, le bien contre le mal, ilz s’accorderent a ce que ou nom de Dieu et de saint George ilz y iroient combatre leurs ennemis. Or adviserent comment, et l’avis ou plus s’arresterent, il leur vint de monseigneur Gautier de Mauni, qui dist ainsi: "Seigneurs, nous monterons tous a cheval et costierons tous a la couverte de ce boys ou nous sommes a present, tant que nous serons sur l’autre coron au léz de la qui joint moult pres de leur ost. Et quant nous serons pres, nous ferrons chevaulx des esperons et crierons noz cris haultement. Nous y entrerons droit sur l’eure de souper, vous les verréz, si sourpris et si esbais de nous qu’ils se desconfiront d’eulz mesmes. " Adont respondirent pb 124 v