Le roy d’Angleterre et les siens, qui s’en venoient singlans, regarderent devers l’Escluse, si virent grant foison de vaisseaulx qui des mas ce sembloit droittement ung bois. Si en fut durement esmerveillié, et demanda au patron de sa navie quelles gens se pouoient estre, le quel respondit qu’il cuidoit que ce feust l’armee des Normens que le roy de France tenoit sur mer, et qui pluseurs fois lui avoient fait grant dommage, et arse n’avoit gueres la bonne ville de Hantonne et conquis Christofle, son grant vaisseau, et occis ceulx qui le gardoient.

¶ Lors respondit le roy : "Certes j’ay longtemps desiré que je les peusse combatre. Si les combatray au jour d’uy, s’il plaist a Dieu et a saint George, car ilz m’ont tant de fois fait de contraires que j’en vueil prendre la vengence." Lors fist le roy ordonner tous ses vaisseaulx et mettre les plus fors devant, et puis fist frontiere a tous costéz de ses archiers, et entre une nef d’archiers il en y avoit une de gens d’armes. Et encores fist il une autre bataille sur costé toute pure d’archiers pour reconforter, se mestier estoit, les plus lasséz.

¶ La y avoit grant foison de dames d’Angleterre, contesses, baronnesses, chevalleresses et bourgoises de Londres qui venoient veoir la royne d’Angleterre, qui se tenoit a Gand, lesquelles le roy d’Angleterre fist moult bien garder a IIIC hommes d’armes et a VC archiers. Et puis pria le roy a tous qu’ilz voulsissent penser du bien faire et garder son honneur. Dont chascun lui ot en couvent.

¶ Quant le roy d’Angleterre et ses mareschaulx orent ordonnees leurs batailles bellement et sagement, ilz firent traire les voilles amont et vindrent au vent, du quartier, sur destre, pour avoir l’aventage du soleil, qui en venant leur feroit au visage, car bien regarderent que ce leur pouoit trop nuire, et detrierent ung petit et tournoierent tant qu’ilz l’orent a leur voulenté. Dont les Normens, qui les veoient ainsi tournoyer, s’esmerveilloient trop pourquoy ilz le faisoient, et distrent entr’eulx qu’ilz ressoingnoient et reculloient: "Car ilz ne sont pas gens pour combatre a nous."

¶ Bien veoient les Normens, par les bannieres, que le roy d’Angleterre y estoit en sa personne, si en estoient tous joyeulx, car trop le desiroient a combatre. Si mistrent leurs vaisseaulx en bon estat, car ilz estoient sages de mer et bons combateurs. Et ordonnerent Christofle, leur grant vaisseau que conquis avoient sur les Anglois en celle mesme annee, tout devant a grant foison de trompes et de trompettes et de pluseurs autres instrumens, et s’en vindrent requerre leurs ennemis.

¶ La se commença la bataille dure et forte de tous costéz, et archiers et arbalestriers commencerent a tirer l’un contre l’autre, et a combatre main a main, a ce qu’ilz peussent mieulx avenir les uns aux autres, ilz avoient grans crocs de fer tenans a chaines de fer, si les gettoient ens es nefs l’un de l’autre affin qu’ilz se peussent mieulx aherdre et plus fermement combatre.

¶ La ot forte et dure bataille, et maintes appertises d’armes pb 60 r