Online Froissart
Home  |  Navigate  |  Apparatus  |  Search  |  About The Edition  |  About The Project  |  Help
Select a word to collate against    Settings    Browse  |  Collate      
Navigate | Close
Preferences
Text / Image Only
Besançon 865
Codicological description
Previous | Folio 129 r | Next

pb 129 rneuries dessus dittes a mercy parmy un moyen qu’il y ot que ces chastelleries et les terres et villes dessus nommees payeroient au roy pour ses menuz fraiz LXM frans et encores estoient reservéz tous vivres, bestial et autres choses que on trouveroit sus les champs, mais on les asseuroit de non estre ars ne prins. Tout ce leur souffisy grandement et remercierent le roy et son conseil, et furent moult liéz quant ilz virent que ilz pouoyent ainsi eschapper. Mais tous les cappitaines de Phelippe qui furent la admenéz, passerent parmy estre decouléz sus le mont d’Yppre. De toutes ces choses, ces traittiéz et ces appaysemens on ne parloit en riens au conte de Flandres, ne il n’estoit mie appelléz au conseil du roy ne nul homme de sa court, s’il lui en anuioit je n’en puis mais, car tout le voyaige il n’en ot autre chose ne proprement ses gens ne ceulx de sa route ne de sa bataille ne se osoient desrengier ne desrouter de la bataille sus ele ou ilz estoient mis par l’ordonnance des maistres des arbalestriers, pour tant qu’ilz estoient Flamens. Car il estoit ordonné et commandé depar le roy et sur la vie que nul en l’ost ne parlast flament ne portast baston a virolle.

SHF 2-330 sync Comment le roy de France se party d’Yppre et comment Phelippe d’Artevelle et les Flamens s’appareillerent pour eulx combatre.

Quant le roy de France et tout l’ost, avantgarde et arrieregarde, orent esté a leur plaisir sus le mont d’Yppre et que on y ot tenuz plusieurs marchiéz et vendu grant planté de bustin a ceulx de Lisle, de Douay, de Tournay et a tous ceulx qui achater les vouloyent, ou ilz donnoyent un drap de Wervy, de Messines, de Propringhe et de Commines pour un franc. On estoit la revestu a trop bon marchié, et les aucuns Bretons et autres pillars qui vouloient plus gaingner, s’accompaignoient ensemble et chargoyent sus chars et sus chevaulx bien emballéz de nappes, touailles, toilles, coutis, or, argent en plats et en vaisselle, se ilz le trouvoient, et puis l’envoyoyent en sauf lieu oultre le Lis ou par leurs varléz en France. Adonc vint le roy a Yppre et tous les seigneurs, et se logierent en la ville, ceulx qui logier s’y porent. Sy s’i refreschirent IIII ou V jours. Ceulx de Bruges estoient bien infourméz du convenant du roy comment il estoit a sejour a Yppre et que tout le paÿs jusques a Gravelines en derrieres luy se rendoit et estoit renduz a luy. Sy ne savoient que faire, d’envoier traitier devers le roy ou du laissier, touteffoiz tant que pour ce terme ilz le laissierent, et la chose principalle qui plus les enclina a ce faire d’eulx non rendre, ce fut qu’il y avoit grant foyson de gens d’armes de leur ville, bien VIIM, avecques Phelippe d’Artevelle au siege d’Audenarde, et aussi en la ville de Gant estoyent en hostaige des plus nottables de Bruges plus de cinq cens chiefs, lesquelz Phelippe d’Artevelle y avoit envoyéz quant il prist Bruges a celle fin qu’il en feust mieulx sires et maistres. Oultre, Pietre du Boys et Pietre le Vintre estoient la, qui les reconfortoyent et leur remonstroyent en disant: "Beaulx seigneurs, ne vous esbahyssiéz mie se le roy de France est venuz jusques a Yppre. Vous sçavéz comment anciennement toute la puissance de France, envoyee du pb 129 v

Launch external viewer    (Requires Java)