pb 430 rheure de prime ilz sonnerent leurs buisines et se appareillerent tout pour le assaillir, et se trayrent devers le chastel lequel est fort asséz, car il sciet en marescaiges; sy y livrerent ce jour assault asséz, tant que ilz furent tous lasséz. Mais riens n’y firent, et sonnerent la retraitte. Quant ilz furent venuz en leurs logeys, les seigneurs se trayrent ensemble en conseil pour sçavoir quel chose ilz feroyent. Et estoyent la greigneur partie d’acord que a l’andemain ilz se deslogeroient de la sans point assaillir et se trairoient tout bellement devers Carlion a leurs gens, mais le conte de Douglas rompy ce conseil et dist: "Ou despit de messire Henry de Persy, si qu’il dist devant yer que il me challengeroit son pennon que je conquis, et par beau fait d’armes, a la porte du chastel, nous ne nous partirons point de cy dedens deux ou trois jours, et ferons assaillir le chastel d’Otebourch; il est bien prennable. Sy aurés double honneur, et verray se la en dedens il vendra requerre son pennon. Se il y vient, il sera deffenduz."

A la parolle du conte de Douglas se accorderent tous les autres, tant pour leur honneur que pour l’amour de luy, car c’estoit le plus grant de toute la route, et se logierent bien et a paix, car nulz ne leur deveoit, et firent grant foyson de logeys d’arbres et de fueilles et se fortiffierent et enclouyrent saigement d’uns grans marescaiges qui la sont, et a l’entree et a l’entree de ces marescaiges, le chemin de Neufchastel, ilz logierent leurs varléz et leurs sommaiges, et mistrent tout leur bestial dedens les marescaiges, et puis firent ouvrer et appareiller grans atournemens d’assaulx pour assaillir a l’endemain; telle estoit leur entencion. SHF 3-286 sync Or vous diray de messire Henry de Persy et de messire Raoul son frere, quel chose ilz firent. Moult leur annuyoit grandement et tournoit a desplaisance ce que le conte de Douglas avoit conquis a la porte du Neufchastel a l’escarmousche le pennon de leurs armes. Encores avecques tout ce, il leur touchoit pour leur honneur trop fort les parolles que messire Henry avoit dittes, se il ne les poursuivoit oultre, car il avoit dit au conte de Douglas que point n’emporteroit son pennon hors d’Angleterre, et tout ce avoit il au soir remonstré aux chevaliers et escuiers de Northombrelande qui avecques luy estoyent logiéz en la ville du Neufchastel. Or cuidoient les aucuns que le conte de Douglas et ceulx qui a leurs barrieres avoient esté ne feust que l’advantgarde des Escocs qui la feussent venuz escarmouschier, et que leur grant ost feust demouréz derrieres. Pourquoy les chevaliers de Northombrelant qui le plus avoient usé les armes et qui le mieulx savoient comment on s’i devoit maintenir et deduire avoient rabatu l’oppinion de messire Henry de Persy a leur pouoir en disant ainsi: "Sire, il advient souvent en armes moult de parçons. Se le conte de Douglas a conquis vostre pennon, il l’a bien achaté, car il l’est venu querir a la porte et a esté bien batu. Une autre foys conquerrés vous sur luy autant ou plus, nous le vous disons pour tant que vous sçavéz, et nous le sçavons aussi, que toute la puissance d’Escoce est hors dessus les pb 430 v