pb 125 rje lonc parlement, ceulz de la partie du conte de Laille furent la tous desconfiz, et presque tous mors et pris, et ja ne s’en fust nul eschappé se la nuit ne fust sitost venue. La ot pris que contes que vicontes IX, des barons et des chevaliers et escuiers tel foison qu’il n’y avoit homme d’armes des Engloiz qui n’en eust ou deux ou trois du moins. Ceste bataille fut dessoubz de Auberouce la nuit de la saint Laurens en aoust, l’an mil CCC XLIIII.

Aprés la desconfiture qui fut si grande et si grosse contre les Gascoings et si dommagable, car ils estoient la venuz en grant arroy et en bonne ordonnance, les Englois, qui estoient maistres et seigneurs du champs, entendirent a leurs prisonniers, et comme gens qui leur ont tousjours esté courtois, leur firent bonne compaignie et en reçurent asséz sur leur fois a revenir dedens un certain jour a Bourdeaux ou a Bregerath. Ils se retraistrent dedens Auberouce, et la donna a soupper le conte d’Erby a la plus grant partie des contes et vicontes qui prisonniers estoient, et aussi aux chevaliers de leur compaignie. Si devéz croire et savoir qu’ils furent celle nuit en grant revel, et rendirent grans graces a Dieu de la belle journee qu’ils avoient eu, tant pou de gens qu’ilz estoient, qui n’estoient environ que mille combatans que uns que autres parmy les archiers, et en avoient desconfit XM et plus, et rescoux la ville et le chastel d’Auberouce et les chevaliers leurs compaignons qui dedens estoient moult astrains, et qui dedens II jours eussent esté pris et en la voulenté de leurs ennemis. Quant ce vint au matin, ung pou aprés soleil levant, le conte de Pennebruth vint bien a CCC lances et CCC archiers, qui estoient informéz de l’aventure de la bataille, car on lui avoit raconté sur le chemin, si estoit durement courroucié de ce qu’il n’y avoit esté, et en parla par maltalent au conte d’Erby et dist: "Certes cousin, il me semble que vous ne m’avéz point fait maintenant point d’onneur ne de courtoisie quant vous avéz voz ennemis combatus sans moy, qui m’avéz mandé si a certes, et pouiéz bien savoir que je ne fusse venuz." Dont respondi le conte d’Erby, et dist tout en riant: "Par ma foy, cousin, nous desirions bien vostre venue, et nous souffrimes tousjours en vous attendant du matin jusques au soir a heure de vespre. Et quant nous veismes que vous ne veniéz point, nous en estions tous esmerveilliéz, si n’osasmes plus actendre, que noz ennemis ne sceussent nostre venue, car s’ilz l’eussent sceu, ilz eussent eu l’avantaige sur nous, et Dieu mercy nous l’avons eue sur euls, si les nous aiderés a garder et a conduire a Bourdeaux. " Adonc se pristrent par les mains et entrerent en une chambre et issirent de ce propos, tantost fut heure de disner, si se mistrent a table et mangerent et burent, tout aise a grant loisir, des pourveances des François, qu’ilz avoient amenees devant le chastel d’Auberouce, dont ilz estoient bien ramplis. Tout ce jour et la nuit ensuivant se tinpb 125 v