pb 375 ret le sire de Coucy retournerent en France et le mareschal de Sanceurre s’en ala en Auvergne en confortant le daulphin d’Auvergne et les barons d’Auvergne qui guerroioient aux Anglois qui se tenoient en Limosin et en Rouergue sur les frontieres d’Auvergne.
Or parlerons comment Yvain de Galles mist en celle saison le siege devant Mortaigne sur Mer et comment il contraigny ceulx de la garnison. SHF 2-20 sync Yvain de Galles qui voult obeir au commandement du duc d’Anjou, car bien sçavoit que ce que le duc faisoit c’estoit l’ordonnance du roy Charles de France son frere, car il paioit tous les deniers dont ces emprinses se faisoient, s’en vint a Xaintes en Poitou et la se refreschi; et s’y rafreschirent toutes gens d’armes en ce bon païs et gras entour Xaintes et Pons en Poitou sur ces belles rivieres et praeries qui la sont. Si estoient en sa compaignie le sire de Pons, le sire de Tors, le sire de Vivoie, messire Jacqueme de Surgieres et grant foison de chevaliers et d’escuiers de Poitou. Et d’aultre part des Bretons et des Normans estoient capitaines messire Maurice de Triseguidi, messire Alain de la Houssoie, messire Alain de Saint Pol, messire Percevaulx d’Aineval, Guillaume de Montcomptour, le sire de Montmort et Morelet son frere. Si se departirent ces gens d’armes et leurs routes quant ordonné fut et s’en vindrent mettre le siege devant Mortaigne, lequel chastel est le plus bel et le plus fort seant sur la riviere de Garonne et prez dessus l’emboucheure de la mer qui soit sur toutes les frontieres de ces marches de Poitou, de La Rochelle et de Xanctonge. Quant Yvain de Galles fut venuz et ces barons et chevaliers avecques lui devant Mortaigne, ilz bastirent leurs sieges bien et sagement et se pourveirent petit a petit de tout ce qui leur besoignoit. Bien sçavoient que par assault jamais le chastel ne concquerroient fors que par famine et par long siege, si ordonna Yvain quatre bastides a l’environ par quoy nulz ne les peust advittaillier par mer, par riviere ne par terre. A la foiz les jeunes chevaliers et escuiers qui avancier se vouloient et qui les armes desiroient, aloient jusques aux barrieres du chastel et la escarmouchoient a ceulx de dedens, et ceulx du fort a eulx, si y avoit fait plusieurs grans appertises d’armes. Dedens Mortaigne estoit ung chevalier gascoing qui s’appelloit le Souldich de l’Estrade, vaillant chevalier et bon homme d’armes durement, par le quel conseil ilz ouvroient et obeissoient ainsi comme a leur capitaine. De vins et de vivres dedens le chastel avoient ilz asséz et largement mais des aultres menues choses le siege durant orent ilz grant necessité.
SHF 2-21 sync¶ Le roy Charles de France, quoyqu’il se tenist a Paris ou en ses deduitz ou la ou mieulx lui plaisoit en France sans ce que de sa personne il s’armast, si faisoit il ainsi a tous letz guerroier ses ennemis les Anglois, et avoit partout ses alliances tant que aux païs voi pb 375 v