pb 375 vroyaulmes voisins plus que nulz de ses predecesseurs quatre ou cinq roys en devant n’eussent oncquez eu; et tenoit grandement a amour ceulx dont il pensoit a estre aidiéz. Et pour tant qu’il sentoit le roy Richart d’Angleterre jeune et le païs entouillié, il avoit envoié en Escoce devers Gap: wanting le roy Robert de Breux son tayon et le roy David son oncle pour tousjours entretenir alliances et amour, que en leur partie ilz feissent bonne guerre et aspre aux Anglois et les ensonniassent tellement qu’ilz n’eussent puissance de passer la mer; de quoy il estoit advenu que le roy Robert d’Escoce en celle saison que le roy Edouart estoit mort et le Richart couronné, il assembla son conseil a Haindebourch et la furent la greigneur partie des barons et des chevaliers d’Escoce, dont il pensoit a estre servis et aidiéz, et leur remonstra comment les Anglois du temps passé leur avoient fait plusieurs ennuiz, ars leur païs et abatu leurs chasteaulx, occis et rançonné leurs hommes dont le temps estoit venu que de ce ilz se pourroient bien contrevengier. Car il y avoit ung jeune roy en Angleterre et si estoit le roy Edouart mort, qui les belles fortunes avoit eues par quoy il en fut respondu d’une commune voulenté. Les barons d’Escoce et les jeunes chevaliers et escuiers qui se desiroient a avancier et a contrevengier les ennuis et dommages que les Anglois leur avoient faitz du temps passé, respondirent que ilz estoient tous appareilliéz et pourveuz de chevaulchier en Angleterre du jour a l’endemain quant on vouldroit. Ces responses pleurent grandement au roy d’Escoce et dist a tous grant mercy. La furent ordonnéz quatre contes a estre capitaines de ces gens d’armes, c’est assavoir le conte de Douglas, le conte de Moret, le conte de la Mare et le conte de Surlant. Et connestable d’Escoce messire Archembault Douglas et mareschal de tout l’ost messire Robert de Versy. Si firent leur mandement tantost et sans delay a estre a ung certain jour a la Morlane. La est aucques le departement d’Escoce et d’Angleterre. Ce mandement faisant et ces gens d’armes assemblant se parti un moult vaillant escuier d’Escoce que on appelloit Alexandre Ramesay, et se advisa d’entreprendre et achever a son pouoir une chaulde emprinse et prist quarante compaignons de sa route tous bien montéz et chevaulcherent tant de nuit et par embusche a la couverte que sur un adjournement ilz vindrent a Bervich, qui se tenoit anglesche. De la ville de Bervich estoit capitaine ung escuier au conte de Northombrelande messire Henry de Persy qui s’appelloit Guillaume Bisséz. Et du chastel de Bervich ung moult appert chevalier qui s’appelloit messire Robert Abreton. Quant les Escocs furent venuz jusques a Bervich ilz se tindrent tous quoys et envoierent une espie devant vers le chastel pour sçavoir en quel estat on y estoit. L’espie se avala ens es fosséz ou point d’eaue n’avoit ne ne pouoit avoir, car ilz sont de sablon bouillant, et regarda pb 376 r
Launch external viewer (Requires Java)
