pb 398 vde Navarre et chevaulcha, et n’avoit en sa compaignie que cent lances, mais c’estoient toutes gens d’estoffe, et chevaulcherent devers Alpharo. Sur l’adjournement, ilz vindrent a une petite lieue prez de la ville et se bouterent la en embusche. Si furent envoiéz pour courir devant la ville messire Guillaume Cendrine et Andrieu Cedrach, et avoient en leur compaignie environ dix lances. Et vindrent jusques a un simple ruif qui court devant la ville lequel on passe oultre a grant meschief; touteffois ilz les passerent et firent Andrieu Andrach et Pierre Bascle, Navarrois, saillir oultre leurs coursiers et vindrent jusques aux barrieres. Adonc commença l’effroy grant et fort a lever en la ville, et sonnerent leurs trompettes les gens d’armes qui dedens estoient. Si s’assemblerent, puis ouvrirent leurs portes et leurs barrieres et se mistrent tous au dehors et commencerent a traire et a escarmouchier. Des dix lances n’en y avoit plus qui eussent passé le ruif que les deux dessus nomméz. Si retournerent quant ilz virent le fait venir, et firent resaillir leurs coursiers oultre. Ceulx de Alpharo virent que ces gens n’estoient que ung petit, et riens ne sçavoient de l’embusche. Si les suivirent si chaudement de prez et passerent le ruif amont ung petit ou ilz sçavoient bien le passage. Ces dix lances se firent chacier jusques a leur embusche. Adonc saillirent avant messire Thomas Trivet et les aultres en escriant leur cry et se bouterent en ces gens qui estoient issus hors et en porterent a ce commencement de leurs lances grant foison a terre.

¶ Au voir dire les Espagnolz ne porent longuement durer contre ces Anglois et retournerent qui mieulx mieulx, mais trop pou s’en sauverent que tous ne feussent ou mors ou pris. L’effroy fut grant en la ville et les cuidoient les Anglois trop bien avoir de celle venue, pour tant que ilz veoient que les gens du lieu se desconfissoient, mais non orent. Car les femmes de la ville la sauverent et recouvrerent par leur bon couvenant. Car entre que les Anglois passoient le ruif elles ensoignoient et vindrent clorre et fermer les barrieres et la porte, et puis monterent aux cresneaulx de la ville et monstrerent grant voulenté d’elles deffendre. Quant messire Thomas en vit l’ordonnance, si dist en criant : "Vez la bonnes femmes! Retournons arriere, nous n’avons riens fait." Adonc retournerent ilz et passerent le ruif la ou ilz l’avoient passé et retournerent vers Kaskan et emmenerent leurs prisonniers, et tant firent qu’ilz y parvindrent. De ceste chevaulchee concquist grant grace messire Thomas Trivet envers le roy de Navarre.

Environ quinze jours aprés ce que messire Thomas Trivet ot fait ceste chevaulchee devant Alpharo et qu’il fut retrait en la garnison de Kaskan, Jehan, aisné filz du roy Henry de Castille, au commandement et ordonnance de son pere, s’en vint a Alpharo atout bien XXM hommes pb 399 r