pb 377 r Monsegrane. Et tout premier le conte de Norhombrelande avec ses gens s’en vint a Bervich dont ceulx de la ville de sa venue furent moult resjoiz. Ainsi se fist le siege en celle saison des angloiz devant le chastel de Bervich et tous les jours venoient gens de toutes pars et furent bien XM ou environ et avoient mis le siege par telle maniere et si pres que un oiselet ne s’en feust peü partir sans congié. Et commencerent les Anglois a faire mine pour plus tost venir a leur entente des Escocs et de reprendre le chastel.

¶ Nouvelles vindrent a ces barons et chevaliers d’Escoce que le conte de Northombrelande et les Anglois avoient assegié leurs gens ens ou chastel de Bervich. Si s’adviserent l’un par l’autre que ilz venroient lever le siege et rafreschir le chastel. Et tenoient celle emprise de Alixandre Ramesay a haulte et belle, et dist le connestable d’Escoce messire Arcembault Douglas: " Alixandre est mon cousin et il luy vient de haulte gentillesse d’avoir empris et achevé si haulte emprise que d’avoir pris le chastel de Bervich. Si le devons tous a ce besoing conforter et se nous pouons lever le siege il nous tourneroit a grant vaillance et je vueil que nous alons celle part." Donc ordonna il lesquelx seroient de sa route et lesquelx demourroient. Et prist cinq cens lances a l’eslite et tous les meilleurs d’Escoce et se partirent tous bien montéz et en bon convenant et che vaulcherent vers Bervich. Ces nouvelles vindrent aux Anglois et aux barons de Norhombrelande qui estoient devant Bervich en grant estoffe car ilz estoient bien dix mille hommes parmi les archiers, que les Escoçois venoient pour lever le siege et rafreschir le chastel. Si orent tantost conseil comment ilz se maintendroient et distrent qu’ilz prendroient place et les attendroient et les combateroient car aussi les desiroient ilz a avoir. Et fist le sire de Persy toute maniere de gent armer et appareillier et traire sur les champs et faire leur monstre et se trouverent bien IIIM et VIIM archiers.

¶ Quant le conte de Northombrelande vit que ilz estoient tant de gens si dist: "Or nous tenons sur nostre place. Nous sommes gens asséz pour combatre toute la puissance d’Escoce." Si se mistrent en ungs beaulx plains au dehors de Bervich en deux batailles et en bonne ordonnance. Ilz n’orent pas la esté une heure quant ilz apperceurent aulcuns coureurs escosçois qui chevaulchoient devant trop bien montéz pour adviser les Anglois. La ot aulcuns chevaliers et escuiers d’Angleterre qui voulentiers se feussent advanciéz de courir jusques a ceulx que ilz veoient chevauchier qui ne leur eust rompu leur propos, mais le sire de Persy leur disoit: "Souffréz vous et laissiéz venir leur grosse route. Car se ilz ont voulenté de nous combatre ilz nous approcheront de plus prez." Ainsi se tindrent tous quois les Anglois et les Escocs de si pres vindrent pb 377 v