pb 317 vla ville de Rue sur mer et aprés vers Monstrueil; et firent tant par leurs journees que ilz rentrerent en la ville de Calais. La donna le duc de Lancastre congié a tous les estrangiers, et se partirent de lui messire Robert de Namur et ses gens, messire Waleran de Borne et les Allemans. Si retourna le duc de Lancastre arriere en Angleterre et les Allemans en leur païs, et n’avoient mais entencion de guerroier jusques a l’esté, car ja estoit la Saint Martin en yver et plus avant. Ou temps qui revenoit le duc de Lancastre avoit dit aux estrangiers que il rappasseroit la mer plus efforceement qu’il n’avoit fait, et prieroit ses cousins le duc de Guerles et le duc de Julliers et feroit ung grant cran en France. Or nous tairons et souffrerons a parler des besoingnes de Picardie, car il n’y en ot nulles en grant temps depuis ce. Et parlerons de celles de Poytou ou les faitz d’armes advenoient plus souvent.

Trop touchoit et avoit ou cuer la prinse de Saint Salvin a messire Jehan Chandos, qui estoit pour ce temps seneschal de Poitou; et metoit toutes ses entencions et ymaginacions ad ce qu’il peust ravoir, feust pour embler ou eschieller, il n’avoit cure comment. Et plusieurs fois en fist des embusches de nuit et a toutes failloit, car messire Loÿs de Saint Julien, qui la gardoit, en estoit moult durement songneux, et bien sçavoit que la prinse de Saint Salvin desplaisoit moult a messire Jehan Chandos. Or advint que la nuit devant la nuit de l’An, ou chief du moys de janvier, messire Jehan Chandos, qui se tenoit en la cité de Poitiers, avoit fait une semonce et ung mandement des barons et chevaliers de Poitou, et leur avoit dit que ilz venissent la tout secretement car il vouloit chevaulchier. Les poitevins ne lui eussent jamais refusé car moult l’amoient. Si s’assemblerent en la cité de Poitiers, et y vindrent messire Guichart d’Angle, messire Loÿs de Harecourt, le sire de Pons, le sire de Partenay, le sire de Puiane, le sire de Tannabouston, messire Geoffroy d’Argenton, messire Mauburny de Linieres, messire Thomas de Persy, messire Baudouin de Fresville, messire Richard de Pontchardon et plusieurs aultres. Quant ilz furent tous assembléz ilz estoient bien IIIC lances. Si se partirent de nuit de Poitiers et ne sçavoient, exeptéz les seigneurs, ou on les menoit. Et avoient les diz Anglois leurs eschielles et tout leur arroy pourveu. Si vindrent jusques au dit lieu. La furent ilz informéz de leur fait et descendirent de leurs chevaulx et les baillerent a garder dedens les fosséz, et estoit environ heure de mienuit. En cel estat ou ilz estoient, et que briefement ilz eussent fait et feussent venuz a leur entencion, quant ilz oyrent le guet du fort qui corna. Je vous diray pourquoy. Celle propre nuit estoit parti de la Roche de Pousoy Carnolet, a XL pb 318 r