pb 321 vsoient retournéz et se vueillent tenir par mauvaise informacion et povre advis a l’oppinion de nostre adversaire le roy de France, nous leur pardonnons ce meffait si ces lettres veues ilz retournent vers nous ou un moys aprés. Et prions a tous noz loyaulx et certains amis qu’ilz se tiengnent en seür estat, tant que de leurs fois et hommages ilz ne soient reprouchiéz, laquelle chose nous desplairoit grandement et les verrions trop enviz. Et se de nostre tres chier filz le prince ou de aulcun de ses gens ilz se plaignent que au present ilz soient grevéz ne presséz ou aient esté ou temps passé, nous leur ferons amender tellement que par raison devra souffire, pour nourrir paix, amour, concorde et unité entre nostre filz et ceulx des marches et limitacions dessus dictes. Et pour ce qu’ilz tiennent ces choses en verité, nous voulons que chascun ait et prende la coppie de ces presentes, lesquelles nous avons solennelment juré a tenir et non effraindre sur le corps Jhesus Crist present nostre tres chier filz Jehan duc de Lancastre, Guillaume conte de Salleberi, le conte de Warvich, le conte de Harefort, messire Gaultier de Manny, le baron de Persy et cellui de Neufville, de Lussi et de Stanfort, Richart de Pennebroc, Rogier de Beauchamp, Guy de Brianne, le seigneur de Manne, cellui de la Ware, Alain de Boucqueselle et Richart de Sturi, chevaliers. Donné en nostre palais de Wesmoustier l’an de Grace nostre regne XLIIIIe et le cinquiesme jour du moys de novembre.

Ces lettres furent apportees par deux chevaliers de l’ostel du roy d’Angleterre en la prinçaulté et duchié d’Acquitaine, et notiffiees et publiees partout, et proprement les coppies envoiees secretement a Paris devers le viconte de Rochechouart, le seigneur de Maleval, le seigneur de Marueil et les aultres qui la se tenoient, ou ailleurs a ceulx qui françois retournéz s’estoient. Mais pour tant que ces lettres eussent esté envoiees ne publiees parmi le païs d’Acquitaine, je n’ouy point dire que nulz en laissast a faire son entencion et voulenté, mais tous les jours se tournoient françois. Et advint si tost que messire Loÿs de Saint Julien fut retourné en la Roche de Pousoy et messire Guillaume des Bordes en la garnison de la Haye en Touraine, Carlouet a Saint Salvin, ilz misrent secretement une chevaulchee sus de gens d’armes et de compagnons hardiz et bien montéz, et vindrent eschieller sur ung adjourner la ville de Chasteaulerault. Et eussent prins et attrappé messire Loÿs de Harecourt, qui dormoit en son hostel en la dicte ville et qui de ce nullement ne se donnoit de garde. Si n’ot plus de retour que de soy enfouir, en pur ses linges, draps et tout deschaux, de maison en maison, de jardin en jardin, et en moult grant doubte qu’il ne feust pris des François qui avoient eschiellé la dicte ville et fourteresse en laquelle, comme dit est, il dormoit en son lit. Et fist tant qu’il s’en vint bouter sur le pont de Chasteaulerault pb 322 r