pb 329 r ars se ilz ne feussent venuz a point, et ramenerent a Noyon plus de XV prisonniers anglois, ausquelx on coppa les testes. Or chevaulcherent les Anglois en leur ordonnance, et monterent amont pour venir en Lannois et pour passer a leur aise la riviere d’Oyse et aussi celle d’Esne. Si ne forfirent riens en la terre ne en la conté de Soyssons, pour tant que elle estoit au seigneur de Coucy. Bien est verité que ilz estoient poursuiviz d’aulcuns seigneurs de France, telz que du viconte de Meaulx, du seigneur de Canny, de messire Raoul de Coucy, de de messire Guillaume de Meleun, filz au conte de Tancarville, et de leurs gens, par quoy les Anglois ne se osoient point desrouter, mais se tenoient ensemble. Aussi les François ne se feroient point entre eulx, mais se lougoient tous les soirs es fortz et dedens les bonnes villes; et les Anglois sur le plat païs, ou ilz trouvoient asséz a vivre de ces nouveaux vins dont ilz faisoient asséz grant largesse. Et chevaulcherent ainssi, tout ardant et exillant le païs et rançonnant, qu’ilz passerent la riviere de Marne et entrerent en Champaigne. Et puis passerent la riviere d’Aulbe, et retournerent es marches de Provins et passerent et rappasserent par plusieurs fois la riviere de Saine, et tiroient a venir devant la cité de Paris. Car on leur avoit dit que le roy de France avoit la fait ung grant mandement de gens d’armes, desquelx le conte de Saint Pol et le sire de Cliçon devoient estre capitaines et gouverneurs. Si les desiroient les Anglois durement fort a combatre, et par semblant ilz monstroient que ilz ne vouloient aultre chose que la bataille. Et pour ce le roy de France escrisi a messire Bertran du Guesclin qui estoit en Acquitaine avec le duc d’Anjou que ses lettres veues qu’il se retrahist en France, car il le vouloit embesoingnier aultre part.
¶ En ce temps revint en la cité d’Avignon le pape Urbain Ve qui avoit demouré a Romme et la environ quatre ans, et revint en esperance comment paix se pourroit faire entre les II roys, car la guerre estoit renouvellee qui trop lui desplaisoit. De la revenue du pape et de tous les cardinaulx furent la cité d’Avignon et la marche d’environ moult resjouiz, car ilz en pensoient a mieulx valoir.
Or parlerons du prince de Galles comment il persevera. SHF 1-661 sync Vous avéz cy dessus oy recorder comment le prince de Galles avoit fait son mandement a Congnac sur l’entencion de aler et de chevaulchier contre le duc d’Anjou, qui lui ardoit et gastoit son païs. Si s’avancerent de venir a son mandement au plus tost qu’ilz porent les barons, chevalier et escuiers de Poitou et de Xanctonge et de la terre qui se tenoit du prince; et se parti le conte de Pennebroch de sa garnison atout cent lances et s’en vint devers le prince. En ce temps arriva au havre le duc Jehan de Lancastre et son armee, dont ceulx du païs furent moult rejouiz pour tant qu’ilz le sentoient bon chevalier et bon cappitaine de gens d’armes. Le duc de Lancastre et ses gens pb 329 v
Launch external viewer (Requires Java)
