The Online Froissart

Select a word to collate against Settings Browse | Collate

pb 185 rnee. Le marquis de Blanquebourc respondi ad ce que de tout ce ne faissoit il compte, et que il avoit l’accord et la voix de la greigneur partie de Hongrie, et que bellement ou autrement l’auroit, et bien estoit en sa puissance. La dame fut toute esbahye de ces parolles, nonpourquant elle se tint ce que elle pot, et manda secours a ses gens, dont elle penssoit a estre aydiee, mais oncques nulz n’aparut ne se mist sus les champs contre le marquis de Blancquebourc, et monstrerent les seigneurs de Hongrie que ilz avoient aussi chier la marchandise aux Allemans que aux Françoys.

¶ Quant la dame vit que elle ne seroit autrement confortee de ses gens, si se laissa conseiller. Car le marquis lui prommettoit, que par force il la prennoit, il la feroit emmurer en une tour et la tenir au pain et a l’eaue, et vesquist tant que elle peust. De ce point estoit la royne toute effrayee. Car elle ne se sentoit pas en trop fort lieu, et si estoit la venue sans nulles pourveances ne de gens, ne de vivres. Sy traitta, et bailla sa fille au marquis de Blanquebourc, qui tantost l’espousa et geut avecques elle charnellement, si fut roy de Hongrie.

SHF 2-465 sync

Ainsi vint messire Henry de Bouesme, marquis de Blanquebourc, a l’eritiere du royaulme de Hongrie, dont il fut roy, le plus par force et le moins par amours, tant que au consentement de la vieille royne, mais faire luy couvenoit ou faire pire marchié. Ces nouvelles furent tantost avoulees en France devers cest evesque et les chevaliers et escuiers de Hongrie, qui la estoient, et qui au chemin mettre se vouloient, et ja estoit le conte de Vallois partis et venuz a Troyes en Champaigne, et avoit prins congié au roy et a son oncle de Bourgoingne. Quant ces nouvelles luy vindrent en la main, porter luy couvint, autre chose n’en pot avoir, si partirent les Hongres tous courrouciéz, bien y avoit cause. Et le conte de Vallois retourna a Paris devers le roy, et les plusieurs de France, grans seigneurs et du sang du roy, ne firent compte de ce remariaige de Hongrie, et distrent que le conte de Vallois estoit bien eureux, quant on lui avoit tollue sa femme. Car Hongrie est un trop longtain paÿs et mal en la main pour les Françoys, ne ja n’en eussent esté aydié ne conforté.

¶ On mist ces choses en nonchalloir. On repenssa a un autre mariaige pour le dit conte a la fille du seigneur de Millan, qui seroit hoirs de toute Lombardie, laquelle est plus riche et plus grasse que toute Hongrie, et mieulx a main pour les Françoys. Nous lairons a parler de ce mariaige et parlerons du duc de Bourbon, qui estoit en Poitou, a siege devant Bretueil, et puis retournerons a l’admiral de France, messire Jehan de Vienne, qui estoit en Escoce, et compterons comment il s’i porta.

SHF 2-466 sync Comment le duc de Bourbon prist Bretueil en Poitou, et comment le roy d’Escoce fist son mandement pour entrer en Angleterre, et comment les Françoys et les Escocs entrerent en Angleterre.

En celle sayson que le roy de France fut en Flandres tant devant le Dam comme ailleurs, le duc de Bourbon, a belle charge de gens d’armes, fist sa pb 185 v

Launch external viewer (Requires Java)

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters SHF Chapters Printed Editions
Go To:

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.