Online Froissart
Home  |  Navigate  |  Apparatus  |  Search  |  About The Edition  |  About The Project  |  Help
Select a word to collate against    Settings    Browse  |  Collate      
Navigate | Close
Preferences
Show Page Image
Besançon 865
Codicological description
Previous | Folio 1 v | Next

pb 1 vpres de une garnison anglesche que on dist Cavillac, qui estoit de l’eritage du Captal de Beuf et a son frere fist une embusche de ses gens en un bois et dist: "Demouréz cy. Je vueil aler tout seul courir devant ce fort pour savoir se nul sauldra hors contre nous." Ses gens demourerent. Il chevaucha oultre monté sur fleur de coursier et vint devant les barrieres de Cavillac et parla aux gardes et demanda: "Ou est Benards Courans, vostre cappitaine? Dittes luy que le sire de Langurant lui demande une jouste. Il est bien si bon homme d’armes et si vaillant que il ne les refusera pas pour l’amour de sa dame, et se il le refuse, il lui tournera a grant blasme, et diray partout ou je vendray que il m’ara reffusé par couardise une jouste de fer de lance." A la barriere pour l’eure estoit uns des varlés Bernard Courant, qui lui dist: "Sire de Lagurant, j’ay oye vostre parolle. Or vous souffréz un petit: je yray parler a mon maistre. Ja ne sera reprouchié que par lascheté il vous reffuse, mais que vous le vueilléz attendre." "Par ma foy," respondy le sire de Langurant, "ouyl." Le varlet se part et vint en une chambre ou il trouva son maistre, si lui recorda les parolles que vous avéz ouyes. Quant Bernads ot ce entendu, si lui engroissa li cuers ou ventre et affellonny grandement et dist: "Ça, mes armes! Ensellés mon coursier, il ne s’en yra ja reffuséz." Tantost fut fait. Il s’arma et monta a cheval, et prist sa targe et son glaive et fist ouvrir la porte et la barriere, et se mist aux champs.

Quant le sire de Langurant le vit venir, si fut tous resjouys, si abaissa son glaive, et mist en ordonnance de bon chevalier, et aussi fist l’escuier, si esprouverent leurs chevaulx, tous deux estoient bien montéz et a voulenté. Si se consuirent des glaives sy roidement emmy leurs escuz qu’elles volerent en pieces, au passer oultre Bernards Courans consuivy a meschief de l’espaule le seigneur de Langurant et le bouta hors de sa selle et le getta sus la terre. Quant Bernards Courans le vit a terre, il fut resjoys et tourna tout court son coursier sur luy, et ainsi que le sire de Langurant se releva, Bernards, qui estoit fort escuier et appert, le prist a deux mains par le bacinet et le tira si fort a luy que il luy arracha hors de sa teste et le getta dessoubz son cheval. Les gens du seigneur de Langurant qui estoient en embusche, veoient bien tout ce, si se commencierent a desrouter pour venir celle part et rescourre leur seigneur. Bernards Courans regarda sur cousté et les vit venir, sy trait sa dague et dist au seigneur de Langurant: "Rendéz vous, sire de Langurant, mon prisonnier, rescoux ou non rescoux, ou autrement vous estes mort." Le sire de Langurant, qui avoit fiance en ses gens pour estre rescoux, se teust tous quoys et riens ne respondi. Quant Bernards Courans vit ce et que il n’en aroit autre chose, si fust tous enflambéz d’aïr et se doubta que il ne perdesist le plus pour le moins, et lui avala une dague que il tenoit sur le chief que il avoit tout nu et lui embarra la dedens, et puis la resacha, et fiert cheval des esperons et se relance ens es barrieres et la descent, et se met en bon couvenant pour lui deffendre et garder, se il besoingnoit.

Quant pb 2 r